
第一世噶玛巴教言集1KM27རྟ་མགྲིན་ལྷ་ལྔའི་མངོན་རྟོགས་བཞུགས་སོ། །
1-2-179b
༄༅། །རྟ་མགྲིན་ལྷ་ལྔའི་མངོན་རྟོགས་བཞུགས་སོ། །
༄༅། །རྟ་མགྲིན་ལྷ་ལྔའི་མངོན་རྟོགས་བཞུགས་སོ། །གུ་རུ་ན་མོ། ཇོ་བོས་མཛད་པའི་རྟ་མགྲིན་གྱི་སྒྲུབ་ཐབས་འདི་ལ་གཉིས་ཏེ། བསྙེན་པ་དང་། ལས་སྦྱོར་རོ། །དང་པོ་ནི། སྟན་བདེ་བ་ལ་འདུག་སྟེ། རང་སྐད་ཅིག་གིས་པཾ་ལས་པདྨ་ཨ་ལས་ཟླ་བའི་སྟེང་དུ་ཧཱུྃ་ལས་རྟ་མགྲིན་དུ་བསྐྱེད་པའི་ཐུགས་ཀར་འོད་འཕྲོས་པས། འོག་མིན་ནས་རྟ་མགྲིན་བླ་མ་དང་བཅས་པ་སྤྱན་དྲངས། མདུན་གྱི་ནམ་མཁར་བཞུགས་ཏེ་ཕྱག་དང་མཆོད་པ་བྱས་ནས། སྐྱབས་སུ་འགྲོ་བ་དང་། སེམས་བསྐྱེད་པ་ཡན་ཆད་བྱ་སྟེ། ལྷ་གཤེགས་སོ། །དེ་ནས། ཨོཾ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ ྅ཧཾ། ཞེས་བརྗོད་པས་ཆོས་ཐམས་ཅད་སྟོང་པ་ཉིད་དུ་བསམ་མོ། །སྟོང་པའི་ངང་ལས་པཾ་ལས་པདྨ། ཨ་ལས་ཟླ་བའི་སྟེང་དུ། མ་ལས་ཉི་མའི་སྟེང་དུ་ཧཱུྃ་གྱུར་པ་ལས། རྡོ་རྗེའི་ལྟེ་བ་ལ་ཧཱུྃ་གིས་མཚན་པ། དེ་ལས་འོད་འཕྲོས་པས། རྡོ་རྗེའི་ས་གཞི་དང་། བླ་རེས་དང་༑ ཕན་ཚུན་དྲ་བ་དང་ར་བར་བསམ། ཡང་རྡོ་རྗེའི་ཧཱུྃ་ལས་འོད་འཕྲོས་འདུས་པ་ལ་རིན་པོ་ཆེའི་གཞལ་ཡས་ཁང་གྲུ་བཞི་སྒོ་བཞི་པ་བསམ་མོ། །དེ་ནས་རྡོ་རྗེ་ཧཱུྃ་དང་བཅས་པ་ཞུ་བ་ལས། རང་རྟ་མགྲིན་སྐུ་མདོག་དམར་པོ། ཞལ་གསུམ་སྤྱན་གསུམ་པ་གཡས་སྔོ། གཡོན་དཀར། དབུས་དམར་བ། སྤྱི་གཙུག་ཏུ་རྟ་མགོ་ལྗང་གུ་གྱེན་དུ་རྟ་སྐད་འཚེར་བ། དབུ་སྐྲ་ཁམ་ནག་གྱེན་དུ་བརྗེས་པ། ཕྱག་བཞི་པའི་གཡས་
1-2-180a
༄༅། །དང་པོ་རྡོ་རྗེ། གཡོན་དང་པོ་པདྨ། འོག་མ་གཉིས་མདའ་གཞུ་འགེངས་པ། རིགས་ལྔའི་དབུ་རྒྱན་བྱས་པ། ཐོད་པའི་ཕྲེང་བས་བརྒྱན་པ། ཡན་ལག་གདུག་པའི་སྦྲུལ་གྱིས་བརྒྱན་པ། སྐུ་སྨད་སྟག་གི་ལྤགས་པས་དཀྲིས་པ། ཞབས་གཉིས་གཡོན་བརྐྱང་བ། གཡས་བསྐུམ་པས་འཇིག་རྟེན་པའི་ལྷ་ཆེན་པོ་བཞི་མནན་པ། མེ་དཔུང་འབར་བའི་དཀྱིལ་ན་འདུག་པ་ཝལ་གྱིས་བསམ། དཀྱིལ་འཁོར་གྱི་ཤར་ན་བ རྡོ་རྗེ་ལས་བྱེད་མ་སྔོན་མོ། ལྷོ་ན་གཤིན་རྗེ་ལས་བྱེད་མ་ནག་མོ། ནུབ་ཏུ་ཀླུའི་ལས་བྱེད་མ་དཀར་མོ། བྱང་ན་གནོད་སྦྱིན་གྱི་ལས་བྱེད་མ་ལྗང་གུ་སྟེ། ཐམས་ཅད་ཀྱང་ཞལ་གཅིག་ཕྱག་གཉིས་མ་གཡས་གྲི་གུག །གཡོན་ཐོད་ཁྲག་བསྣམས་པའོ། །སྙིང་གའི་ཧཱུྃ་གི་འོད་ཀྱིས་གཙོ་བོ་ལ་ཡེ་ཤེས་སེམས་དཔའ་དགུག་གཞུག་བྱ། འཁོར་ལ་ཡང་ཕྱོགས་ཕྱོགས་དགུག་གཞུག་བྱའོ། །དེ་ནས་བཟླས་པ་བྱ་སྟེ། སྙིང་པོ་ཨོཾ་ཧ་ཧ་ཧི་ཧི་ཧྲི་ཧྲི་ཧཱུྃ་ཧཱུྃ་ཕཊ། ལྷ་གཞན་ལ་ཐེབས་ན་འབུམ་མམ་བྱེ་བ་མ་ཐེབས་ན་བཟླས་སོ། །ཨོཾ་བཛྲ་ཀྲོ་དྷ་ཧ་ཡ་གྲྀ་ཝ་ཧུ་ལུ་ཧུ་ལུ་ཧཱུྃ་ཕཊ་ཀྱི་ཞབས་སུ། བཛྲ་ཤྭ་ན་ས་མ་ཡ། ཡ་མ་ཤྭ་ན་ས་མ་ཡ། ན་ག་ཤྭ་ན་ས་མ་ཡ། ཁ་རག་ཤྭ་ན་ས་མ་ཡ། བརྒྱ་ལ་སོགས་པ་བཟླས་སོ། །གཏོར་མ་འབྱུང་གཏོར་གྱིས་བཏང་། བསྟོད་པ་དང་འདོད་པའི་དོན་ལ་གསོལ་བ་གདབ་བོ་ལ་སྦྱོར་ནི། རྒྱལ་པོ་ལ་བྱེད་ན་ཉེ་སྙིང་གི་མཇུག་ཏུ། རྒྱལ་འགོང་རྒྱལ་
1-2-180b
ཚེ་ཚེ་ལ་མ་ཤ་དམ་རོ་ལ་ཁྲག་འཐུང་། སྙིང་ལ་འབྱུང་པོ་འབྱུང་མོ་སྲ་ཏི་སྲ་མོ་ཚེ་ལ་མ་ཤ་དམ་རོ་ལ་ཁྲག་འཐུང་། སྙིང་ཁྲག་མ་ལྟ་མ་ལྟ། ཡཻས་ཡཻས། བྷྱོ་བྷྱོ། ཀྲཾ་ཀྲཾ་སྭཱ་ཧཱ། ཞེས་གདགས་སོ། །ཀླུ་གནོད་ན། ཨོཾ་ཀ་རུ་ཙ་ལེ་ཙ་ལེ་ཏ་ཀ་ཙི་ཏི། བྷི་ཙ་ཏི། ཧུ་ཡ་ཧུ་ཡ། ཧུ་ལུ་ཧུ་ལུ། སུ་རུ་ཏེ་སུ་རུ་ཏེ། ཧཱུྃ་ཕཊ་སྭཱ་ཧཱ། ཞེས་གདགས་སོ། །བཅོམ་ལྡན་རྟ་མགྲིན་གྱི་མངོན་རྟོགས་རྫོགས་སོ།། །།འདིའི་རྒྱུད་པ་ནི། ཇོ་བོ་ཨ་ཏི་ཤ །ཚུལ་ཁྲིམས་རྒྱལ་བ། ཝལ་པོ་ཆེན་པོ། ལྕགས་རི་ཀོ་བ། དྭགས་པ་རིན་ཆེན། དུས་གསུམ་མཁྱེན་པ། བླ་མ་དབུ་སྟོན་པ། རཏྣ་གུ་རུ། འཇམ་དཔལ་སེང་གེ །ཤར་དགོན་པ། མཁན་པོ་ཀུན་དགའ་འོད་ཟེར། བསོད་ནམས་དཔལ། དེས་བདག་ལའོ།། །།


目录
རྟ་མགྲིན་ལྷ་ལྔའི་མངོན་རྟོགས་བཞུགས་སོ། །